ربع تون

                                :محمود مرعى

دمعتين فرح البنات

غنوتين الحزن قالوا

ليه تدوس على خلق مالوا

وانت موصوم بالسكات

كان طبيعي تهج منها

وكان غرورك ضربة الدبه الأخيره

لسه قلبك فى مكانه

لسه إحساس الضفيره

لما لمس وصل فاتك

لما أدناك من حياتك

وابتسم

ليه قلت غِيره

حلمك الكداب حملته

فوق كتاف غداره سيبته

مش لقيت وصف لجنابك

داب كلامى ف بحر حيرته

ابتديت ارسم همومي

خط عرض ونقطه باهته

شيلت توهان البنات

روحت بادره ف كل حته

نبتت كل العراوى

ورده طازه في الزكته

هات شمال واستنى حبه

جمَّع التايهين غناوي

كل مره أعدى محنه

ألتقيك بياع حكاوي

دوس على زناد الكلام

يمكن الغايب يعود

سيبته مره في الزحام

هام في تفاصيل القدود

بص ع الجسم وبراحه

هج م الماضى وجراحه

واقتفى لحن الخلود

فوق ضفاف المشربيه

جات يمامه وكان غراب

شمس صافيه وريح تراب

قصر شامخ دار خراب

كل شيء محبوس في ضده

وهو مشدود للسراب

بس لما النيه تصفى

والكلام المر يحلى

طلقتك حتكون صميم

ياااااااااااااااه على الواد اللئيم

شاف حروف ملضومه مدنه

خبي جوه الحزن عيدنا

قولنا م الأول وعيدنا

كل ما نعيد في الغناوي

اللئيم يمسح عهودنا

انكسر في العود وترنا

صولو غنت بنت جارنا

لحن من أيام زمان

شمسنا خاصمت نهارنا

فات نهار كان ضلمه جدا

شق دربه ديك بيدن

صوته صحى جرح ساكن

يبتسم لما انت تحزن

قولنا خاين قولت ممكن

صحنا خاين قولت ممكن

ليه دموعك ملح صافي

كل شيء جايز وممكن

عُدت في الأحلام تدعبس

فط نط الواد وهيس

المرار صاحب شرابك

والبنات رافضه تعنس

لف دار ورا بنت مزه

الجدار انهار في غمزه

مش لقيلك وصف شافي

تيس حقير ولا انت معزه

رَجَّع اللحن لجنابه

امسح التون من جدوره

لو تلاقي لحن ناشع

طفي نوره

حدد التوقيت لبكره

نام وسيب للكون جدوره.

 

 

 

 

 كانت عنيكى مدمعه أصلا

والكحل خان الرمش واتمادى

رعشة شفايفك واضحه بزياده

خدك مزنهر كانه ورد حزين

همسة كلامك شاربه جرس أنين

كل الحروف بكيانه مبتوره

حاولت اضمك غامت الصوره

وقعت ملامحك ع القزاز زهر

جرحت ملامحك قلبي راح نوَّر

وريت شجوني لحادى كان حزنان

لملمها لكن طعمها كان مر

كل النياق خلفه بقت تجتر

ضحكه قديمه بين سطور رسمك

ممكن أقول اسمك

 

آخر مقامات الفزوره

شعر: محمود مرعى.

يا بكا المواويل

فى ليالى الهجر

يا دموع الأرض القسيانه

بعويل الغدر

أنا كنت رجعلك

ومخبى فى القلب صروح

خويانه الروح

اللى تعدد من غير احزان

وجبان العمر

أما يمدد في سنين النوح

كام مهره أصيله أما بتجفل

من حمل البوح

وتدوس ع الأرض المهجوره

فالأرض تفوح

مجاذيب وحواري بتتقلب

فالدمع يروح

على خد الأطفال السُذذج

فتقوم قيامات

آخر مقامات الفزوره

كان الانسان

والتون الهارب

من ريقي

وقت حريقي

أدمن توهان النسيان

دي عصيه الفرحه

ومدبوحه

وغبيه الضحكه

ومفضوحه

وحواري الأيام مفتوحه

على وكر الغول

وحدادى الغابه المجروحه

عماله تطن

وصراخها مغطى

على قلوبنا وحرمنا نئن

فتزغرت بومه وتتحزم

لفحيح حيات

الشكوى نيات

بس ودانا عشقانه الطين

أهرب يا قزين

أرمى حمولك

في بلاد الناس

لملم غناويك المكسوره

دوبها ف جاز

واشرب على روح المزيكا

واسكر حكايات

حلوه السيكا

مخنوقه بياتى وشيكا بيكا

ومدبوحه برست

وان كان ع الكرد ونهاوندو

فالجرح يساع

ده كتير اوجاع

حطت على كتف الغندوره

مكسور البرواز في الصوره

والعتمه آهات

صدقنى وهج

العقل بكامل تراكيبه

هيضيع ويوج

والأرض حتجحد سكانها

وتنام مسافات

والشبر المسروق من عمرك

حيموت م الخوف.

 

 

 

 

 

 

يوميات إيبي الجزء الثانى

احدث اصداراتى

دراسة الجميل / بهاء الدين حسن عن قصة حماده من مجموعتى " هى والقمر "